江玉歡四年議會生涯「盡歡而散」　談敢言作風：議員講真話不應自設枷鎖

基層出身、苦讀成為律師再投身政界的江玉歡，在四年任期內被市民譽為「講人話」的代表，如今她選擇謝幕、道別立法會。對許多人而言，認識她或許始於免針紙、盲人揸車、跳鋼管舞等話題，但真正讓她紮根在大眾心中的，始終是「敢言」二字——她在四年任內為底層發聲、為民生據理力爭，一句「我證明得到俾市民睇，江玉歡過去嗰四年係用心。我做到，咁我覺得已經足夠」，道盡從政初心；而這份「敢言」與「用心」，並未隨棄選落幕，她指未來仍會以不同身份延續服務社會的承諾。 

 無黨派憑一腔熱血當選　「我有團火可以幫個社會做嘢」

走入江玉歡辦公室，最先吸引目光的不是辦公桌上堆疊的文件，也不是書櫃上琳琅滿目的書籍，而是辦公桌上的多啦A夢。「細個時候屋企好窮，我冇乜機會有公仔」，她抿著嘴遺憾地說，只能在長大後再「補償」自己。江玉歡憶述，自己是孤兒出身，讀街坊小學、官立中學，正是因為香港社會給了她受教育的機會，才鑄造出今天的她，「如果當日社會冇畀一個教育嘅機會我，我其實有冇今日呢？冇。我冇去過外國讀書，我全部都係喺香港嘅，我係土生土長嘅香港人；我冇錢，但我有能力，我有團火，我可以幫個社會做嘢。」 

2021年立法會改制，新增選委會界別40席，江抱著「有心就得，試下啦」的心態，邁出參選的一步。然而，她當時既無政黨幫忙聯繫資源與人脈，作為獨立參選人又無知名度，「江玉歡都唔知係乜水」，直言當時「單拖」的情況「好難」。為說服各選委，她密集地跑了六七十場選委見面會；每晚回家，無論多累，她都堅持「做功課」，「人哋個見面會會問我乜呢？佢個界別會有啲乜嘢係佢關注嘅呢？當時我唔係就咁樣去重複講同樣嘅嘢，我對每一個界別都有充分嘅準備。」而這份決心，最終讓她幸運地成為「尾幾個入選」進入立法會，開啟議會生涯。 

議員講真話不設枷鎖 

當江玉歡宣布不競逐立法會時，不少市民在她的社交平台留言「可惜」。作為一個被市民稱為「講人話」的議員，江玉歡認為議會能否容納「講真心話」的議員，關鍵不在制度，而在於議員自身是否設下太多枷鎖，「如果議員自己擺咗好大嘅一個枷鎖係自己嘅身上，set咗好多hurdles（障礙）俾自己，咁當然唔會講到嘢。如果一個議員佢嘅初心係想社會好，想社會進步，想政府一樣能夠得到市民愛戴，佢講真心說話又有啲乜問題呢？」   

江玉歡坦言，做議員與做律師有極大分別。身爲律師，她會毫不猶疑向客戶道出所有意見；身爲議員，則需要因應環境和政治有所保留，「有啲嘢可以唔使講，或者有啲嘢可以唔講晒，有啲嘢可以遲啲講。」她指，在議會考慮一件事不只是需要看法例條文本身，更要看法例背後的東西，以至政治環境，「因為呢個係政治，政治梗係牽涉到政策。」

盲人揸車惹議　「我唔係聖人」 望市民別只看污點

去年4月立法會委員會審議電子駕駛執照修例，問及政府如何透過電子駕駛執照便利殘疾人士，江玉歡誤問「特別係盲人來講有咩便利？」，引來一片笑聲。她大方承認確實是不小心口誤。她解釋，自己一向重視法案審議工作，一定會預先研讀相關條文，但有時臨場都會產生疑問。她憶述，當時自己一時「鑽咗牛角尖」。由於審議法例節奏極快，一旦錯過便難以回頭追問，「所以我當時一諗到就撳啦，冇好小心嗰個問題。」 

對於這次失誤，她自嘲當時表現「好傻」，不過就重申是無心之失，「我希望市民唔好介意，有時其實聖人都有錯，何況我唔係聖人呢？」「希望市民唔好淨係去掛住呢一個污點，睇下其實佢都有時唔係錯得晒嘅。 」 

免針紙被批　「事實勝於一切」

四年議會，江玉歡指最難忘的還是「免針紙」一事。2022年9月，有7名私家醫生因涉嫌濫發醫學豁免證明書（俗稱免針紙）被捕，但政府並沒有交代法律依據。當時江玉歡在社交平台點名質疑醫務衞生局局長盧寵茂，指其做法「專橫」，更反問「法治是香港的基石，亦是一國兩制的重要一環。如今是誰壞了法治？」事件引來爭議，另一議員吳秋北更批評江玉歡行為是「猴戲」。 

回顧事件，她指免針紙的影響力「好大」，而法官判詞亦證實她正確，「有啲嘢如果我能夠真係做晒research，我唔係空口講白話」、「我唔係為反對或者為出位而出位，有啲嘢係事實勝於一切，亦都見證咗係法律嘅觀點來計，法律最重要嘅係乜，事實。 」而當時批評她的吳秋北，她指兩人「冇嗌交」，也會合照和聊天。 

建立市民信任非「勤力就得」　放下心結方得向前出發 

對於多名年屆70的議員選擇交棒，她樂見其成，拭目以待新人能帶給議會什麼新氣象，「如果佢哋真係唔用心，去到辜負咗呢一班老將嘅表現，咁呢個市民都自有批判嘅係咪？ 」至於自己，江玉歡則笑言，自己走得都優雅，走得開心。而對於新一屆立法會，她則認為最大挑戰是如何重建市民的信任與信心，「呢一樣就唔係咁勤力就得架喎，呢一樣嘢我相信唔係三言兩語能夠講得到，係要靠每一次同市民嘅接觸，無論係訪問又好，或者去到留意一啲時事都好。 」 

而對香港和下屆立法會，江玉歡認為香港社會仍存在一些「心結」，唯有共同破解，香港才能真正向前邁進，「我覺得有時香港人呢，仍然可能係有一啲嘅心結，無論係經濟上嘅心結，或者係其他嘅心結，如果香港要能夠要向前一啲，呢一種心結，一定要大家都破開，如果唔係我哋走唔前。」 

指導老師：陳景祥

江玉歡轉身成為傳媒人　盼繼續聯繫大眾